اسلام آباد۔4فروری (اے پی پی):پارلیمانی سیکرٹری قومی صحت ڈاکٹر نوشین حامد آکھیے جو سائنو فرم ویکسین 18 سال توں گھٹ عمر لوک ، حاملہ تریمتاں تے الرجی آلے لوکاں کوں کائناں ݙتی ویسی ۔اپݨے ہک انٹرویو اچ انہاں آکھیے جو 2021 دے چھیکڑ تئیں ملک دی آبادی دے 70 فیصد شہریاں کوں ویکسین ݙیوݨ دا ہدف رکھیا ڳئے ۔ انہاں آکھیے جو چین توں وصول تھیوݨ آلی ویکسین سینوفرم 70 یا ایندے توں ودھ عمر دے لوکاں کوں کائنیاں ݙتی ویسی ۔ آسٹرا زینیکا ویکسین جیڑھی جو وختی پاکستان پڄ ویسی او وݙی عمر دے لوکاں کیتے موزوں ہوسی۔انہاں آکھیے جو ویکسین دا ݙوجھا مرحلہ آندے مہینے شروع تھی ویسی جیں کیتے 1166 پلیٹ فارم دے ذریعے اندراج سارے شہری کرا سڳسن ۔نوشین حامد آکھیے جو چین پاکستان کوں سینوفرم ویکسین دیاں 5 ملین خوراکاں تحفے اچ ݙتن ۔ انہاں مزید آکھیے جو گاوی 45 ملین پاکستانیاں کیتے آسٹر زینیکا ، فائزر، ویکسین ݙیوݨ دا وعدہ کیتے امید اے جو اڄوکے مہینے پاکستان پڄ ویسی ۔چینی ویکسین کینسینو دی پاکستان 20 ملین شہریاں دی ویکسینیشن کیتے خوراکاں بک کروائن ۔ انہاں آکھیے جو اے ترائے ذرائع کٹھے رل تے 70 لکھ پاکستانیاں اچوں65.25 ملین دا احاطہ کریسن ، جنہاں دی ویکسینیشن کیتی ویسی ۔انہاں آکھیے جو حکومت ایں ڳالھ کوں یقینی بݨاوݨ کیتے ݙینھ رات کم کریندی پئی اے جو 70 سال دی عمر دے بزرگ لوک فرنٹ لائن ہیلتھ ورکرز دی فروری دے ادھ تئیں ویکسینیشن کر ݙتی ونڄے ۔ہک سوال دے جواب اچ انہاں آکھیے جو کووڈ۔ 19 ویکسینیشن مہم دے دوران سرکاری پلیٹ فارم تے اے ویکسین رجسٹرڈ لوکاں کوں مفت لاتی ویس ۔انہاں مزید آکھیے جو عام لوکاں کوں کو آگاہی ݙیوݨ دی لوڑھ اے تاں جو او آتے ویکسینیشن کراون ۔
