ترجمہ : ڈاکٹر سعدیہ کمال
محمد طیب
اسلام آباد۔11فروری (اے پی پی):احساس پروگرام دے تحت پورے ملک اچ ضروری سہولتاں دیاں حامل پناہ گاہواں دا قیام معاشرے دے مستحق لوکاں کیتے ہک انقلابی اقدام اے، اے پناہ گاہیں گھراں توں پرے ایجھے غریب لوکاں دیاں رہائشی ضرورتاں کوں پورا کریندیاں پئن جیڑھے جو رہائش دے خرچے برداشت کرݨ دی طاقت نی رکھیندے ۔ وزیراعظم عمران خان دی حکومت معاشرے دے کمزور طبقے دیاں ضرورتاں کوں پورا کرݨ کیتے ہر سطح تے اقدامات چاتے، پناہ گاہواں دا قیام وی ایں سلسلےدی ھک کڑی اے۔ ایجھے لوکاں جیڑھے جو گرمی تے سردی اچ کھلے آسمان تلے زندگی گزارݨ تے مجبور ہن ،حکومت انہاں پناہ گاہواں دی صورت اچ ھک ایجھی سہولت ݙتی جتھاں انھاں لوکاں کیتے ݙو ویلھے دے ٹکر پاݨی سودھے رہݨ دی سہولت مل سڳے
ستمبر 2020ء دے بعد توں احساس پناہ گاہواں دے ذریعے پنج لکھ 6 ہزار521لوکاں ایں سہولت توں فیدہ چاتے جنھاں اچوں57 ہزار 338 لوکاں کوں پناہ اتے 4 لکھ 49 ہزار 183 لوکاں کوں ٹکر پاݨی دیاں سہولتاں ݙتیاں ڳئن ۔ فروری 2021ء دے دوران ہݨ تئیں 51ہزار 860 لوکاں انہاں پناہ گاہواں توں چیدہ چاتے جنھاں اچوں 4 ہزار 718 لوکاں کوں پناہ تے 47 ہزار 142 لوکاں کوں ٹکر پاݨی ݙتا ڳئے ۔ وفاقی دارالحکومت دے علاقوں بھارہ کہو، منڈی موڑ، پشاور موڑ، ترلائی اتے ترنول اچ بݨائیاں ڳیاں پنج پناہ گاہواں توں ہݨ تئیں چار لکھ 82 ہزار30لوکاں فیدہ چاتے جنھاں اچوں 56 ہزار 673 لوکاں کوں پناہ اتے 4 لکھ 25 ہزار 357 لوکاں کوں ٹکر پاݨی ݙتا ڳئے ۔ حکومت ہݨ ایں منصوبے کوں سندھ، بلوچستان اتے خیبر پختونخوا تئیں توسیع ݙیوݨ اچ مصروف عمل اے۔
جہلم توں تعلق رکھݨ آلے عامر ندیم وزیراعظم عمران خان دے ایں کم دی تعریف کریندے ہوئیں آکھیے جو ایں منصوبے توں غریب شہریاں کوں بہترین سہولتاں ملیئن ۔ ایجھا قدم ٻہوں پہلے چاوݨاں چاہیدا ہئی ۔ انھاں پناہ گاہواں اچ ݙتیاں ونڄݨ آلیاں سہولتاں تے اطمینان دا اظہار کریندے ہوئیں آخھیے جو پناہ گاہواں اچ لوکاں دے اندراج دا باقاعدہ طریقہ کار اے۔ پاکستان بیت المال اتھاں صفائی دے بہترین انتظامات کیتن ۔ متعلقہ عملہ پناہ گاہواں اچ قیام کرݨ آلیں نال تعاون کریندے ۔ انھاں مزید آکھیے جو اے سہولت ݙیوݨ توں بعد اساݙا فرض بݨدے جو اساں عملے نال تعاون کروں تے کورونا ایس او پیز تے عمل کروں۔
ضلع صوابی توں محمود حسن پناہ گاہواں اچ ݙتیاں ونڄݨ آلیاں سہولتاں کوں بہترین قرار ݙیندے ہوئیں آکھیے جو اے غریباں تے محنت کرݨ آلیں کیتے بہترین سہولت اے ۔ایندے توں پہلے غریب لوکاں کوں ودھ سارے پالے دے موسم اچ دکاناں تے فٹ پاتھ تے سمݨا پوندا ہئی ۔ ہݨ پناہ گاہواں اچ انہاں کوں بسترے تے سوݨیں ملدن اے غریباں کیتے ٻہوں وݙی سہولت اے۔
جی نائن پنا گاہ دے شفٹ انچارج محمد عبید اللہ عباسی ݙسایا جو انہاں دے زیرانتظام پناہ گاہ اچ 100 بستر ہن جتھاں رہݨ آلے لوکاں کوں تے ٹکر پاݨی دے نال طبی سہولتاں ݙتیاں ویندن ۔ انھاں ݙسائے جو اے منصوبہ پاکستان بیت المال دی نگرانی اچ کم کریندا پئے ۔ انہاں آکھیے جو پناہ دی جاہ اچ ہک باقاعدہ طریق کار تے عمل کیتا ویندے جیں موجب پناہ گاہ اچ رہݨ دے خواہش مند لوکاں دا شناختی کارڈ ڳھدا ویندے۔ ایندے توں ڳھدی ڳئی معلومات دے مطابق کارڈ جاری کیتا ویندے جیں تے بسترے دا نمبر درج ہوندے ۔انہاں ݙسائے جو پناہ گاہ اچ قیام کرݨ آلیں کوں سہولتاں ݙیوݨ کوں یقینی بݨایا ویندے ۔ عبید اللہ عباسی مزید آکھیے جو پناہ گاہ اچ رہݨ آلیں اچوں بیمار لوکاں کیتے اپݨا ڈاکٹر دی وی باقاعدہ طبی سہولت موجود اے۔ پناہ گاہ اچ کہیں وی بیمار بندے کوں ݙیکھݨ کیتے آن کال ڈاکٹر دستیاب ہوندے ۔
ہک ٻئی شفٹ انچارج میمونہ قریشی ݙسایا جو پناہ گاہ اچ آوݨ آلے لوکاں دا پہلے معائنہ کیتا ویندے تے انہاں کوں سینیٹائزرتے ماسک دی سہولت وی ݙتی ویندی اے ۔پناہ ݙیوݨ وچ وݙی عمر دے ٻڈھے تے بیمار لوکاں کوں ترجیح ݙتی ویندی اے اتے انہاں کوں سہولت ݙیوݨ کیتے ایجھے بسترے الاٹ کیتے ویندن جتھاں انہاں کوں واش روم تئیں ونڄݨ اچ کوئی اوکھ نہ تھیوے ۔
