اسلام آباد۔11فروری (اے پی پی):وزیراعظم عمران خان آکھیے جو انتظامیہ ضروری چیزاں دے مقرر کیتے ڳئے نرخاں تے عمل درآمد یقینی بݨاوے ، افسر غریباں دی تکلیف دا احساس کرن ، خمیس کوں وزیراعظم عمران خان دی صدارت اچ اعلیٰ سطحی اجلاس منعقد تھیا جیں اچ وفاقی و صوبائی وزراء اتے متعلقہ وفاقی و صوبائی سیکرٹریاں وی شرکت کیتی ،ویڈیو لنک دے ذریعے اجلاس دے دوران صوبیں دے چیف سیکرٹری وی موجود ہن۔ وزیراعظم کوں سینئر صوبائی وزیر فوڈ پنجاب ولوں ݙسایا ڳئے جو انہاں دی ہدایت دے مطابق پنجاب حکومت فلور ملز کوں 07 جولائی 2020 ء توں کݨک ݙیندی پئی اے ۔وزیراعظم کوں ݙسایا ڳیا جو ہݨ تئیں 36 لکھ ٹن کݨک 50 ارب روپے سبسڈی دے نال جاری کیتی ڳئی اے۔ اجلاس کوں ݙسایا ڳیا جو پنجاب اچ کݨک تے 510 روپے فی مݨ دے حساب نال ودھیک ٻوجھ حکومت برداشت کریندی پئی اے تے اے ٻوجھ صافین تے نی پاتا ویندا پیا ۔ وزیر اعظم وزیر خزانہ کوں ہدایت کیتی جو او موجودہ خریداری دے نظام دا جائزہ گھنن تے محکمہ فوڈ دے ذریعہ تھیوݨ آلے ودھیک خرچے کوں گھٹ کرݨ دے مقصد کیتے ہک موثر کاروباری ماڈل تجویز کرن۔ چیف سیکرٹری پنجاب اتے خیبر پختونخوا وزیر اعظم کوں پھل تے سبزی منڈی دے قیام کیتے صوبیں دے موجودہ ریگولیٹری میکانزم بارے ݙسایا۔ چیف سیکرٹری خیبرپختونخوا ݙسایا جو وزیر اعظم دی ہدایت دے بعد صوبے اچ 65 کسان مارکیٹس قائم کرݙتیاں ڳئن ، پورے صوبے اچ تحصیل دی سطح تے13 مارکیٹاں قائم کیتیاں ڳئن جنھاں دے لائسنس نیلام تھئے۔اایندے توں انج 23 جہیں تے مارکیٹاں قائم کیتیاں ڳئن ۔وزیراعظم کوں پنجاب زرعی مارکیٹنگ ریگولیٹری اتھارٹی ایکٹ 2018 دی موجودہ دفعات اتے ایندے بعد تھیوݨ آلی ترمیم بارے ݙسایا ڳیا ۔وزیر اعظم نجی فارم مارکیٹاں دے قیام کیتے سخت کسوٹی کوں مسترد کریندے ہوئیں ہدایت کیتی جو نجی شعبے کوں سوکھا ، سادہ اتے سستیاں سہولتاں ݙیوݨ کیتے موجودہ میکنزم دا جائزہ ڳھدا ونڄے۔
